(لما الديك يبيض)

 (لما الديك يبيض)

أحمد السعيد الفقي

رغم الواقع البغيض

لسه فيه

للأمل وميض

يطلع

نهار جديد

يعم الخير ويزيد

والكل يبقى سعيد

بس أعمل أيه

في خيالي المريض

كأنه شيطان مريد

بيخنق أي أمل وليد

ويكز على سنانه

ويطلع لسانه

ويضحك ضحكة صفرا

ومعاها

إشارة بالإيد

وهي كلمة واحدة

قالها

وبالبنط العريض

عارفين إمتى

الخير يدلدق ويفيض

لما الديك يبيض

فجأة

قلبي ينقبض

والضحكة

فوق الشفايف تموت

وأقول عليه العوض

وصراخي

يشق السكوت

الغرض مرض

ونعيم الحياة عرض

زايل

وهي عيشة

وآخرها موت

والموت من المفترض

هو الشيء الوحيد

اللي في حياتنا أكيد

الأمل جوايا

ثار وإعترض

وبكل قوة رفض

يعيش دور الشهيد

قام صرخ وإنتفض

وبعلو الصوت

قال بكره

يطلع نهار جديد

لو الكل إتحد

والإيد بقت في الإيد

المستحيل ولو كان أسد

هيبقي

سهل الترويض

ساعتها بس

يدلدق الخير

ويفيض

من غير ما الديك

يبيض

احمدالسعيدالفقي مصر

عرض الرؤى

معدل وصول المنشور: ٩

كل التفاعلات:

١ارق ملاك