والله حرام اللي بيحصل
ازاي ده يكون على اي اساس
رايحين على فين ولفين نوصل
حد يفهمني بجد يا ناس
من بعض الكل بيتنصل
والشر اشتر ملى الكراس
الكدب علينا بقى متفصل
والغش اتشال ع العين والراس
من اتفه حاجه بنتهور وبنتأثر
وف لحظه يهونوا اعز الناس
بعديها بنرجع نتحسر كله اتكسر
بعد اما الوقت يعدي خلاص
بقت البراءة موضة قديمه
ويوماتي نصحى على جريمة
خيال ياناس ولا في السيما
اللي اتحرق واللي اتشنق
واللي اتخنق
من كتمة الانفاس
دي عشان أبوها مزعلها
قلقان عليها وعلى حالها
كل اللي بده والود وده
لو جوه عينه يا ناس شالها
ما هي بنته برضه
و كان كل غرضه
تخاف عليه وتصون عرضه
لحد يوم ما يستَّرها
خدها الشيطان جالها الهاجس
سيطر يا ناس على افعالها
خلاها ماشيه كما العاجز
بدل وغيّر احوالها
في ثواني نطت من الخامس
قضت يا ناس على احلامها ومستقبلها
قتلت صديقة عمرها
اللي على حياتها امنتها
عاشت معاها أحلام صباها من صغرها
بسهولة قامت خنقتها
لاجل الفلوس وطمع النفوس
على شله سوء اتعرفت
على ورقه بيضا بقلم رصاص
رسمت مخطط ودبرت
يدوب ساعات كان كل شئ
خلص خلاص
والورقة دوغري اتحبرت
كان عيش وملح
بقى ويل وجرح
وكل حاجه اتغيرت
هانت عليها صاحبتها
بوزة شيطان
نست اللي كان
مافاقتش لما اترجتها
ضاع قلب طيب
مالوهش ذنب
غير انه آمن
وعاش بحب
وواحده خاينه
خبت طمعها وكرهها
ماكنتش باينه
ولا حتى باين شرها
ضاعت خلاص واتدمرت
بقلمي/ خالد جمال ٦/٣/٢٠٢٤
ليست هناك تعليقات:
إرسال تعليق