اتخضيت
خد عقلي مني
دوِّبني فيه
لحظة ما جمبه انا عديت
وسألني قلبي
مالك فيه إيه
على قلبي حتى مارديت
دانا من حلاوته
وجمال عنيه
من نظره ليه اتشديت
ووقفت عيني
تتملى فيه
بالدنيا ديه ماحسيت
ده خبطني رمش
جاب اجلي بيه
دانا من جماله اتهديت
والكون ده كله
مش سامعه ليه
باين عليا اطرشيت
زي امَّا اكون
سكران يا بيه
او بنج بيه اترشيت
وف عز طوبه
راح بردي بيه
دانا لما شفته اتدفيت
حسيت بحضنه
بدَّارى فيه
وبرمش جفنه اتغطيت
حس بغرامي
وهيامي بيه
وبصّ زي ما بصيت
مسّت عليا
نظرة عنيه
برموش عنيا انا رديت
ولقيت ايديا
حضنت ايديه
وف ثانيه واحده انا حنيت
وسألني عني
قاللي اسمك إيه
مالقتش رد اصلى نسيت
نساني اسمي
احساسي بيه
اول ما شفته انا طبيت
خد قلبي مني
راح فين وسابني
دانا ياما ليه اتمنيت
بقى كل املي
بعد اما فاتني
حد يروَّحني على البيت
اتاريه كمان
نسَّاني سكني
ده كله لما اتخضيت
بقلمي/ خالد جمال ٩/١/٢٠٢٤
ليست هناك تعليقات:
إرسال تعليق