زجلية تحت عنوان:فْضح ***

 زجلية تحت عنوان:

فْضح ***

فضح

داوي لجرح راه قيًح

وقدام لفُساد ...

غ شرًح ؤ ملًح

رد لبال ففي سوق الغفلة يشريوك

يديرو لك البيضة فِ الطاس ويرميوك

تفقد الشان ؤبز منك تنبطح

وقف ؤ صحصح

صن حق لعباد

بالظلم جلخوه ولعناد

راسي يا راسي لْهف ؤ رْبح

فضح

لبلاد محتاجة للبذرة الأصيلة

لي تغير وتكون سند وجبيرة

لا تلين مع العلة غلًظ وقسًح

ذوك الطبالة ؤ صحاب هْلالة

راهم ردوا لبلاد غابة والسيبة هالة

فقروا لمسكين ...

وعلى صراخو شي تنشوى ؤ شي تمرح

فضح

عصابة لحمية والغبرة

تجار العدالة ؤ صحاب ارى والهدرة

تجبروا وطغاو والصابر عْيا وصْرخ

بل عادوا علينا قادة

بدلوا لحق ؤ قاسوا لعدالة

جمعوا السلطة والمال...

زرعوا لمنكر السحت والقبح

بل باعوا لمخلوق وفي سوق الذلة وسموه

نحتوا متشابهات والكادح جهلوه

مكبل بالظلمة وجامي صبحو يصبح

ما سمعوا لصياحو ؤ ما خافوا الله

ك لحرام ك لحلال عندهم ك الآه

قسوة لقلب والحس حجرة وقرح

ؤ ذاك لمسكين ريشو ليه جناحو

زادوه هم على همو ؤ جهر ب نواحو

نهبو لغلة ؤ قاسوا الملة...

عصابة السراق والقهرة وتْسَنطح

فضح

ذاك النهاب ؤ لطباعو عري

حُط حقيقتو ؤ لصدق صورتو وري

كبير لكرش هذاك أناني...

ؤ زرعو ما يسبل ما يفلح

غارق في درب شرو شيطاني

ردو نقصو طاغوت عدواني

عاد فوهة بركان

مات فيه الانسان

ؤ ما عاد يسوى ولا يصلح

فضح

وجوه النقرة وقلوب لكياص

باركا من الصمت ففيق من النعاس

راهم عادوا ثقلة و وسواس

شي يركل ؤشي يهدم ؤ شي يفرشخ

بل في كل مسرب دايرين عساسة

سدوا لابواب ؤ بالريال شراو التراسة

تجبروا وطغاو والقلب تألم وتجرح

عواد راشية هكا كانوا زمن و ازمان

نساو لماضي الريال بدلهم يا فلان

عادوا شناقة وكيلهم طفح

فضح

كل سراق يدو سريفة

ؤ لِ نْهب ؤ هرًب كابر جيفة

بدًر المال العام وبه ساير يتفطح

فضح

***الشاعر والزجال: أحمد الكندودي ***المغرب ***

كل التفاعلات:

٢٢