قال جاي بتقولي البعد مرار..

 قال جاي بتقولي البعد مرار..

وانك من بعدي عايش منهار..

وفـ نار البعد ياعيني على نار..

إن كان ده هزار انا كلي مرار..

وبطلت خلاص إني اهزر..

قال راجع دلوقتي تبرر..

وتحور في حوار فاكسان

وعايش في دور الندمان

وراجعلي ببواقي زمان

ده لو انت حبك إدمان

بطلت أزكور أنا واتخضر..

والله عيل خيبان

وجيتني علي شان تتهان

ده لو انت اخر إنسان

وفي حضنك الدنيا امان

عمري ما هرجعلك ولا أفكر..

لا ده انت بتحلم مش اكتر..

فكك من لكك بقي واكبر..

وإسترجل لو كنت هتقدر..

خليك مع حالك احلالك

ولأخر مره بقولهالك

لو جاي في هزار

انا كلي مرار

وبطلت خلاص إني اهزر..

ولو جاي ع الجد خلصنا بجد

ومافيش بينا حاجه مكمله..

كل اللي اتبنى ع الكدب اتهد

ومن وقتها وانا مش عيله..

حلينا ضفاير الوهم ياعم

والجرح اتلم

والعقل كبر ع المريله..

وبطلت أمشي بسناده

يادي ام القصه المتعاده

إنساها خلاص بقي بزياده

كفياك هرتله..

انا فوقت من أثر الصدمه

وعرفت إنك أكبر كدبه

ومالكش

مثيل ياض في المعيله..

ياللي انت من بدر راميني

ومشقيني

وبحاسب لوحدي في سنيني

ولما اتعلمت انا لوحدي

قال راجع علشان تشرحلي

ايه هي ابعاد المسئله..

وقال راجع علشان تداويني

وتكون سندي وراجلي وتحميني

لا اسمع مني يا أنيني

دنا قُصة شعري على عيني

ارجل منك واللهِ ياله..

فـ من غير بهدله وهري وهرتله..

قوم لم كرامتك في اعفن كيس

وغور يارخيص

ده مافيش عاقله تسيب قصرها

وجميل عِشقها

وتروح تفرش بإديها جرحها

وضياع عمرها

عشان تسكن بيهم مزبله..

...... فهمت ياله؟.......

_______

الشاعر عبدالحميد علي