انا وحدتي جامعة أحزان..

 انا وحدتي جامعة أحزان..

جامعه فيها الحزن كيان..

مافيهاش نجاح ولافيه رسوب

مافيش هروب ولا فيه ضمان..

انتظام مش انتساب

والمنهج كتاب اكتئاب

وكل ليله فيه إمتحان..

لـ اسئله مالهاش حلول

علي ورق القلق بتنادي..

والراحه غياب على طول

في إعادة تدوير الماضي..

والماضي طوفان وسيول

بتدمر في سّد التغاضي..

والجرح اللي كان مقفول

يفتح بأحزان زمان سادي..

والوجع اللي كان مقتول

يفوق جروح بروح أعادي..

فـ كل اللي مش معقول

في غرابة قصتي بقي عادي..

لما التأقلم بيتمكن بيمشي الزهول

والتوقع بيجيب الصدمه ع الهادي..

بتعدي في دخان سجاير

أو في غلوه لدم فاير

في عُزلة حرب رصاصها طاير

طبيعي يكون الخذلان اللغام..

وفي بشر عالمصلحه داير

الضمير في بيع الضماير

الكل باع وأصبح تاجر

حتى المحبه باعوها كلام..

وليل الوحداني ده اناني

بينور سماه بحرق الأماني

ويعيد اللي فات من تاني

لقطات تعدي فـ عقلي خراب..

ومن بين هموم اليل يهل

بدر حزني المُكتمل

بنور مقهور وزيف أمل

يفكرني بميت ظن خاب..

وتجيب الذكريات وتودي

الصدمات دموع على خدي

زلزلتني زمان لوحدي

وتوابعها دلوقتي فـ قلبي

بتهد رغبة الأحلام..

كل حلم يجي يحلمني

ويحاول إنه يطمني

فيزيد قلقي ويقفل قلبي

وجرح الماضي غصب عني

يقلفني مـ إللي جاي قدام..

ويرميني ع اللي فات وأتندم

كام مره للحب أسلم

وأوفي واخلصلهم واتألم

وانجرح واصبر واتعلم

لما أستكفي القلب علام..

م اللي قال محال هسيب

كان لي غدر وكنت طبيب

واللي مثل دور حبيب

ثم باع وقال نصيب

في النهايه الكل ساب

وعشمي خاب

والإنسحاب مُر الختام..

فـ الآلام معايا اصدق

من تخدير بشر أوهام..

والأحزان جوايا بتسبق

أي فرحه بشكل عام..

والسنين ترتاح لو اقلق

وتعبي راحه للأيام..

في دنيا خاينه مالهاش مبدأ

الناس بحور ياتثور ياتغرق

والاخلاص خلاص مش أصدق

من خاين هيدفع كام..

________

الشاعر عبدالحميد علي

عرض الرؤى

معدل وصول المنشور: ٩

كل التفاعلات:

١Mansour Benmansour