#هي_كلمه

 #هي_كلمه

كلمه ، أيوه كلمه

كلمه بتفرحنا وكلمه بتجرحنا

وكلمه وقت زعلنا تطبطب وتريحنا

كلمه بتودينا وكلمه بتجيبنا

كلمه بتدوبنا وكلمه بتعذبنا

واحنا ياناس غلابه ..

مافي أطيب من قلوبنا

الكلمه سيف بيقطع مودة الصحاب

ويبعد الحبايب ويغدر زي الذئاب

الكلمه رسول الحبايب ووصل الأغراب

الكلمه ملاك يصالح وشيطان بيفرقنا

واحنا ياناس غلابه ..

مافي أطيب من قلوبنا

كلمه تخلي الحبيب هايم ويا حبيبه

وبرضوا هي كلمه ال تخليه يسيبه

كلمه على اللسان تطلع من حد تعشقه

وكلمه تانيه تطلع فى الحلق تخنقه

كلمه تشترينا وكلمه تبيعنا

واحنا ياناس غلابه ..

مافي أطيب من قلوبنا

كلمه تودي الجنه وكلمه تحدف ف النار

كلمه تحلي عيشتنا وكلمه تقلبها مرار

كلمه تنور بيتنا وكلمه تطفش م الدار

قول الكلمه الحلوه بلاش اللي بتوجعنا

بلاش الكلمه ال نطفي بيها ياخلق شموعنا

واحنا ياناس غلابه ..

مافي أطيب من قلوبنا

حافظ ع الكلمه دايماً وخد بالك منها

في الخير خليك معاها وقرب منها

ولو كات في الشر ماشيه بلاش عنها

الكلمه نبض طالع نحيي بيه آمالنا

ياريت تفضل معانا وتبقى هى توبنا

دا احنا ياناس غلابه ..

مافي أطيب من قلوبنا

عبدالحميد المرسى

عرض الرؤى

معدل وصول المنشور: ١٧

كل التفاعلات:

١١