انكسر جوَّايا شئ _________

 انكسر جوَّايا شئ

_________

أنا كُنت شئ أصبحت شئ

حزين ومالل كل شئ

أنا كنت شئ

حاسِس وحابب كل شئ

أصبحت شئ

زاهِد ورافِض كل شئ

أصْله انكسر جوّايا شئ

أيّوه انكسر جوّايا شئ

شئ عزيز عزيز وغالي

غالي وأغلى من كل شئ

دانا كنت شئ أصبحت شئ

حزين ومالِل كل شئ

أنا كنت بحلم أبقى صوت

للحق يِنْدَه بأعلى صوت

يا حق عمرك مَراح تُموت

تعالى داحنا صُحْبتك

سكِّتنا هيَّ سكِّتك

كلمتنا هيَّ كلمتك

ضِحْكتنا نور من ضحكتك

دمعتنا نار من دمعتك

وف دنيا النفوس أنا شفت شئ

غيَّر فيَّ كل شئ..

واتاري ...

الحقّ شئ والدنيا شئ

انا كنت شئ أصبحت شئ

حزين ومالل كل شئ

صادفت مرَّه أهل الحقوق

رَفعين رايات للحقّ عاليا ف السَّما

يحْكُوا حكايات يِرْوُوا روايات

للحقّ عملين مَلْحمه من مَلْحمه

ويقولوا لو الأمر بإدينا

ما حَتلْقى ف الناس مَظْلمه

ولَمَّا رَفَعْتلهم بجَهْلي مظلمه

وكان يَقيني العدل قاضي المحكمه

لَقِيت قاضِيها الخِصْم نفسه والحكم

الله حكم .......الله حكم

قَاللي يا ابْني ازاي بترْفَع مَظْلَمه

على كبير المحكمه

فِكرك حَتثْبِت ضدِّي شئ

وان يوم ثَبَتْ

طبْ مين ح يحكم لك بشئ

قلت الحقوق

والرَّايات....... والحكايات

قاللي يا ابْني دانْتَ شئ

من ألف شئ

والحق داللي بتطلبه

جنب النظام والسيطره

ميْساوي شئ

خلاَّني اكره كل شيء

وقتل كمان فيَّ الثقه .

في كل شيء

دانا كنت شئ أصبحت شئ

حزين ومالل كل شئ

ولَمَّا نِمْت وقلبي حزين

سِمعت صوت خَنَقُه الزمن

بيقوللي يا ابْني مَليش وطن

وف أرضكم مليش سكن

أهلي باعوني من زمن

ومن الشيطان

ويَّا الهوى والمصلحه

قبضوا التمن.. أبْخَس تمن

وبصِّيت لقيت الحق

جايْلي مُستكين

باين عليه تعب السفر

جيِّ بملامح شيخ حزين

شكله كده

جاي من خطر .

رايح خطر

بصِّيت وقلت إنت مين

قاللي أنا..... اللي السنين

غرَّبِتني ودوَّقِتني طعم المرار

سوَّاح ودايِر ف البلاد

لا لِيَّ أهل ولا لِيَّ دار

سالِت دموعي وقُلْتله

يا حق خُدْني لَك وطن

أنا قلبي ليك أكبر سكن

لو كنت وَحدي حَخْدِمك

وانا مُسْتعد للتَمن

قَاللي يا ابني هوِّن عليك

دا غُرْبِتي بينكم قدر

يا رِتْني بس... بس ألاقِيك

لو يوم أعُوزك ف الخطر

دانا يا إبني ف أرضكم

تِقيل... وأتْقل من أي شئ

وصْحِيت لَقتني

بقول يا رتْني

أبيع وأنسَي كل شيء

دانا كُنت شئ أصبحت شئ

حزين ومالل كل شئ

أصلُه انْكسر جوّايا شئ

أيوه انْكسر جوّايا شئ

شئ عزيز عزيز وغالي

غالي وأغلى من أي شئ

دأنا كنت شئ أصبحت شئ

_________

الشاعر. محمدامام

كل التفاعلات:

٢٥الشاعر. محمدامام و٢٤ شخصًا آخر