القرابه ساعات كتير
ممكن تكون من غير نسب
والعمر عمره ما كان سنين
اد إيه وكام اتحسب
في دمعتك بيكون حزين
ف شدتك ضهر اتنصب
دايما رايدلك كل خير
لا لمصلحه ولا فيه سبب
إن رحتله تلقاه كريم
وإن جه اليك عفه وادب
حافظ عليه شيله ف عنيك
ده نعمه ربك ليك وهب
والعمر صعب يكون ساعات
تتقضى بين هم ونكد
ولا يتحسب كام وقت فات
على حد من يوم ماتولد
ده العمر فرح وامنيات
بسمه ف عيون بنت وولد
انسى الألم اطوي الهموم
مع بعض ونعيشها برضا
ليه تملي بتشوف الغيوم
وتقول خلاص خلصت كده
اغسل جراحك يالا قوم
طلع النهار فجرك بدا
ماتسيبها ع الحي
خليها ع القيوم
دي ليها رب واحد أحد
بقلمي/ خالد جمال ٢٦/٢/٢٠٢٤
ليست هناك تعليقات:
إرسال تعليق