ياك ما كاين باس!( زجل مغربي)

 ياك ما كاين باس!

( زجل مغربي)

ما بين طرقان متنوعة

عزلت ف نهار طريقي

توكلت على الله كفاية

هو عنايتي ورجايا

بديت مواصل خطواتي

راحل مهاجر وساطي

مكره أكثر من لقياس

وغايتي نلاقي بحالي

شي رفيق يونس خلواتي

يكون ليا عوين ولباس

ضيعت سوايع كثيرة

سالت بالدم عليها عيوني

محاين ترميك لمحاين

كل الطرقان بحال.. بحال

لا فرق من غير العنوان

راه البشار لي ولى ليوم غذار

آش طرى يا ناس؟!

ياك ما كاين باس!

فين غادي من الأساس؟!

كلشي تالف وعلاش؟!

حرت وزݣيت فبلاصتي

شفت لعجب بهاذ لعيون

شفت الخو ياكل خوه

والصديق لصديقو اصبح عدوه

تمنيت لو عندي الجناوح

تمنيت نكون مخلوق آخر

من غير لي عليه وأنا صابر

الله يسمح ليا على هاذ لكلام

راه الݣلب تألم كثير مع ليام

-بقلم: محمد دومو

-مراكش/ المغرب ( 04 فبراير 2024 )

عرض الرؤى

معدل وصول المنشور: ١٠

كل التفاعلات:

١ارق ملاك