الكل طمنى --------------ابومهاود محمد أحمد حسن

 الكل طمنى

--------------

حبك كما السياف

عمره ما يوم بيخاف

بالعكس كان مسرور

لما يعذبنى

وانا شهيد الغرام

جريت عليكى أوام

ولا حد فهمنى

ولا حد قاللى الحقيقه

إن بحورك غريقه ..

الكل طمنى

وانا كما الفراشات

بتحوم على نارك

فاكره نيرانك ضى

صحيح عيونك جميله

رموشها ضليله

ولا كنش ليهم زى

لكن غرامك محال

وأغلب الأحوال

كان الفراق محتوم

والقلب لو مكلوم

يجوز علاجه الكى

ولا انه يتمنى

غرامك المستحيل

يسهر بيتعذب

ويقضى طول الليل

فى الحزن والمواويل

وانتى تمللى بعيد

عايش خيال ف خيال

دايما على دا الحال

وانتى ولا انتى هنا

ولما يجى الدور

تنادى على مسرور

يقطع وتين روحى

ونوحى انا موصلش

ولا حط ع الجودى

لو كان الهوى بإيدى

لكنت يوم اهرب

من قبضة السياف

ولا انى اتعذب

او قلبى مره يخاف

م العشق وسنينه

أدى اللى واخدينه

م الشعر والتفانين

على الدوام عاشقين

ولما نقول بنحب

يقولوا دول مجانين

_________

ابومهاود

محمد أحمد حسن

عرض الرؤى

معدل وصول المنشور: ٢٥

كل التفاعلات:

١ارق ملاك