باز *** زجلية *** الشاعر والزجال: أحمد الكندودي ***المغرب ***

 زجلية تحت عنوان :

باز ***

باز

سنطيحة ولوجه كنزاز

لا صدق لا معقول

عاجبو راسو معلول

ول كَاع لْخبث الدنيا هاز

امالك من لمقلة تطير

تالف واحل ما عرف آش يدير

قلة الأدب والتنقاز

طبعو غريب

مرة حمل مرة ذيب

مرة حنش هماز لماز

فباز

صبغتي بالزور ضوء لهلال

ماشي ك لمسكين ك صاحب لمال

الكيل بمكاييل دباز

درتي لحجرة في الجباد

ببلاك قستي لحيا ولعباد

شي سدتي فمو ...

ؤ شي نغزتيه بالنغاز

وخا صاح وأن

لقلب ما عدل ما حن

عاجبو راسو قزقاز

لعافية في دواخلو كَادية

دايخ جرًاه جهالتو لهاوية

عاد مشوك نقرس وكزاز

طاج

وعلى لهزيل سبع وباز

راكب لكلخة ولفضيحة

مخلوق فاشل الطيحة تابعة الطيحة

في لخنز والقبح ...

ولهبيل زايدها ب التعباز

ساير يهرطق بلا فرامل

خاوي في لعبو بات حاصل

شي يلعن ؤ شي يسب...

ؤ شي يقول عليه باز

فنوض تكمش ؤ رسا

لا دير عصا ف رويدة ؤ لا ضرسة

فكر عاد نطق..

لجم لسانك ؤ دير لو منغاز

باز

*** الشاعر والزجال: أحمد الكندودي ***المغرب ***

كل التفاعلات:

٢٢