عندي

 عندي

عندي ريشة

صادڨ ما نخلط

ڨمحي بدشيشة

صادڨ و النغمة تخربيشة

صادڨ و الحلم تفرفيشة

صادڨ و نكمل فيامي

نهار دڨلة و نهار بسيسة

عندي ريشة

عندي ريشة

نحلف بيها و نحلم بيها

نحفل بلي يفرح بيها

و نعادي منهو يعاديها

عندي ريشة

عندي حصان و عندي لجام

في الفزعة أنا المقدام

للظالم سيفي ڨسام

و للمظلوم جناح حمام

عندي ريشة

كي تكتب نفرز لكلام

للصاحب نحفظ لمقام

و كي نعادي سهمي مسمام

عندي خشم و ما نندم

لا نهبط شارة و لا علم

نغلط أما نوڨف فم

و نعتذر كان لزم

لقوة كي الواحد يفهم

حدودا و ما يصبح ظالم

عندي خشم

عندي كتاب

نزيد ... انقص في لحباب

لي راني نعملا حساب

لي تلفت ندزى مالباب

لا تحتار و لا تكتاب

ازهى كل شيء بأسباب

عندي كتاب

عندي شاني

لا نستبرن لا براني

بعزّي نقرب للي دعاني

و نولي علي خلاني

نبغي الي قلبا بغاني

و نعرف لي يضحك زعباني

عندي شاني

عندي جناح و ماني طير

نرفرف كي نعزم ما نحير

في الجو نعدي مشاوير

بين الحكمة و التدبير

نرجع كي نشرب مالبير

و نلڨا حل لكل عسير

عندي جناح

عندي الزين

و ڨلب حنين

نشرب كي نزود في الحين

و ما يكيدوني خطواتك حتى فاتوني

لا ڨفزت نوجه مڨروني

نصيب الدوني

و نتكى حذايا مضنوني

عندي الزين

عندي سرج و عندي فرس

و سر الصاحب ديما ندس

لا يخرج لا يدير الحس

عليه سرجي ديما كابس

نَخْطَا السيّا ما نعفس

و رزڨ الغير أنا ما نمس

عندي فرس

عندي كلمة

عندي كلمة نحلف بيها

مهما تصعب ما نخليها

نحطاط و ديما نلبيها

لكلمة كي السيف لعاطيها

تكبر و لا تصغر بيها

عندي كلمة

عندي عندي و ياما عندي

و نحمد ربي لي ساندني

عاطيني الصحة في بدني

فكر حكيم و قلبي صندي

و نحمد ربي علي عندي

الهاشمي البلعزي

في

2024/01/26

عرض الرؤى

معدل وصول المنشور: ١٤

كل التفاعلات:

١ارق ملاك