حرّ الشهيلي
حرّ الشهيلي و الڨايلا عديتا
و برد الشتا غطيتا
و صاحب السو بيدي رميتا
-*-*-*-*-*-
لصحاب كي تفرزهم
غربال صڨت طفت عمايلهم
عَبِّي يديك اجملهم
تلڨاش واحد من جملة مجاملهم
-*-*-*-*-*-
تلڨاش واحد باهي
تلڨاش واحد بالخير ڨلبا زاهي
ديرا ڨبالك حتى تبدأ لاهي
يتفكرك بالخير حتى ساهي
-*-*-*-*-*-
ليام يا جرايا
كاتب قصايد جبت كل حكاية
نغزل كلامي و نعدل السداية
و في كل يوم نڨول هذي بداية
-*-*-*-*-*-
حرّ الشهيلي و الڨايلا عديتا
و برد الشتا غطيتا
و صاحب السو بيدي رميتا
-*-*-*-*-*-
الشعر يجري فراسي
و نرتبا و نسطرا بمڨياسي
حافظ ڨدر جلاسي
بالهيل نحفل و نزيد في كراسي
-*-*-*-*-*-
شديت راس الفتلة
و غرست مالأشعار بيدي شتلة
طريڨ المحبّة سعتلا
يا غصن ظلل و مواجعا هفتلا
-*-*-*-*-*-
هفّت و نادي عليها
لا حرت نِتَكَى على رُكبيها
دمعات من عينيها
نشناش يروي كي حطّت عليّ يديها
-*-*-*-*-*-
حرّ الشهيلي و الڨايلا عديتا
و برد الشتا غطيتا
و صاحب السو بيدي رميتا
-*-*-*-*-*-
عَدِّلت في المنڨالا
و كل من عرفتا سهلت عن أحوالا
مشعشبا في حالة
حالة بلاد العُرب يا رجالا
-*-*-*-*-*-
حالة حليلة هانا نعانو
ليوم خوتنا في القدس علينا هانو
هم يبطشوا و احنا هنا نتهانو
يا رافعين الصوت زيدو بانو
-*-*-*-*-*-
هَيَا نشدوا يدينا
ما فم كان الله لي يحمينا
ما رميتشي .. ما رماش .. ربّي معانا
يا قدرة الطوفان في ميدانا
-*-*-*-*-*-
حرّ الشهيلي و الڨايلا عديتا
و برد الشتا غطيتا
و صاحب السو بيدي رميتا
-*-*-*-*-*-
بإيماننا نعدوها
فترة صعيبة و القدس تو نردوها
أرض الطهارة و الصدق و نحبوها
يا ربّ رجع أهلها يبنوها
-*-*-*-*-*-
مِتْخَيلَا في شعرها
فلسطين عروسة و مغليا في مهرها
الشهيد زاد ڨدرها
بدما العزيز فداها و ما سعرها
-*-*-*-*-*-
بدما كتب عزّتها
صامد عروقا ثابتا فتربتها
لوجاع عليه تكاثرت شتتها
التاريخ كاتب لأرض ما فرطها
-*-*-*-*-*-
حرّ الشهيلي و الڨايلا عديتا
و برد الشتا غطيتا
الظلم هاني ريتا
و العزّ في فلسطين هاني قريتا
الهاشمي البلعزي
في
2023/12/11
ليست هناك تعليقات:
إرسال تعليق