رقصة المدبوح
------------------
ورقه وقلم ...
والحبر من دمى
وليه من دون البشر ..
ولا غير حنان امى
وحضنها الدافى
واى شيء بعدها
بيبقى مش كافى
لا صاحب يشيل الهم
ولا خل كان وافى
فين اللى كان حضنهم
يسقيك حنان صافى
ورقه وقلم ...
والحبر من دمعى
لملمت كل البواقى
سالب طلع جمعى
وفيت بكل مابى
لما انقفل بابى
على جرح مر صعيب
اللى افتكرته حبيب
كان هوا سبب جرحى
سابلى دموع العين
فاتنى وخد فرحى
وادانى ورقه وقلم
كتبت بيهم ألم
والحبر من دمى
دورت ف سواقى الوفا
غشيم ومتغمى
ندمت ع الاخلاص
وقولت بس خلاص
كفايه حسره وألم
والذنب مش ذنبى
غفرت كل الخطايا
لما انكوى قلبى
ورقصت كالمدبوح
باطلع يا ناس فى الروح
وسهمهم مغروس
بالغدر فى جنبى
-------------------
ابومهاود
محمد احمد حسن
ليست هناك تعليقات:
إرسال تعليق