سكة سفر

 سكة سفر

عشت حياتي كلها

بالطول ويا العرض

لا فكرت ابني لي بيت

ولا اشتري حتة ارض

والمال ما حبتوش

وصرفتة علي طوب الأرض

وعلي بذرة مش بذرتي

زي الزلط في الأرض

والشمس بعد ما صهللت

لقيت نفسي في وسط الأرض

لا ظل شجرة يظلني

ولا عكاز يسندني

لما الضهر أتني وانحني

والدنيا في. أخر رحلتي

غدرت بي وساوتني بالأرض

وركبت قطر. الندامة

ورجعت من تاني. لأول السكة

ما لقيتش غير حصيرة

مرمية عل الأض

ومعاها حتة دكة

عايش وراضي بالمقسوم

وما كفرت بالنعمة

وكل يوم انادي علي الدنيا

تقولي صدقني ما انا سامعة

دعبست في دولاب احلامي

علي حلم. قديم يكون عل الرف

لقيت حلم جميل مركون

في أخر رف

نفضت تراب الزمن من عليه

ظهرت لي حروفة

قعدت ارص فيها

حرف ورا حرف

وبقت معاني اتكلمت

وبضحكة بهتانة

بصرخ واقول الأه

والدنيا سمعاني

يا دنيا أختشي بقي

وخلي عندك دم

خلاص وضهري انكشف

ولا ولد يسند ضهر

وما فيش. خال ولا عم

حلمي صغير علي قد ايامي

ياله بقي اتبسمي

وصالحيني في اخر ايامي

وانا راجع من سكة سفر

اتاريها سكة ندامة

بقلم

احمد محمود

من ديوان حبة رتوش

عرض الرؤى

معدل وصول المنشور: ١٠

كل التفاعلات:

١ارق ملاك