جيش هولاكو
___________
اصحى شوف البندقيه
طلق طالع منها خايب
طلق ميه
صوت عيالك صرخ طالع
بيناديلك
فين زمانك ..شوف حصانك...
ركبه غيرك
كل ساعه بألف صرخه
وميت شهيد
الف طعنه وكربلاء ..
وحسين جديد
كل يوم الارض تطرح
الف هم وصوت بارود
اصحى يالا قوم وقيدها
الف بدر وعين جالوت
جيش هولاكوا
جاى بيهدم فى المساجد..
والكنايس .. والبيوت
جى وشايل لك تابوت
جيش هولاكو..
جى وناوى ع الخرب
جاى ونافش ريشه لاسود
بومه زاعقه وصوت غراب
جى يدور ع الدمار
بسلاح دمار
جى وفاكر ان زيتنا
أغلى من دم الصغار
ياما جانا قبل منه
كتير وغار
وبعدها طرحت جناين وردها
فوق أرضها
مليون نهار
تصبح جماجم غلهم
لعبه ف ادين الصغار
وبعدها..
يجى النهار
مليون نهار
-----------------
ابومهاود
محمد احمد حسن
ليست هناك تعليقات:
إرسال تعليق