زجلية تحت عنوان: بَشحال بعتي هْناك ***

 زجلية تحت عنوان:

بَشحال بعتي هْناك ***

بشحال بعتي هناك

قيمتك لذاك الأفاك ؤذاك

اليوم ردوك حلاسة

ؤخسرتي مقاسك...

و بنواعرهم وسخوك ؤ شراوك

قالوا الراس بزرقة او قرفية

هي صنارة لفكارن أهل الدونية

بفعلتك هرستي جناح النسور...

ؤ لشراك هانك وعراك

بل رهنتي حياتك بيد منغوصة

الشوهة والسوسة والصورة المنحوسة

عدو راسو ل اختار لحموم سواك

سوق التنوعير هكا حامي بالدلالة

جمع السلطة والمال سلعة الهيئة والهالة

البيع والشرى في المخلوق ...

والتاجر بوصيحة افاك

هي الصورة عار ؤما فيها ما يصلاح

طار لغراب والردم على لهبيل طاح

ضربتي الطم وسكتتي ...

حيت فيك لعجينة وبالذل رضيتي

تقضي حاني الراس وربي جزاك

ؤباش تبعتي بالرخص لشفار شلاهبي

عدتي شياطة عندو ما تسوى يا صاحبي

ظنتيها دايمة والطمع سوادو دًاك

فشحال عطاك

باش بعتي مستقبل الحال وفرحة الربيع

ياك ل شدتيه ما ردك غير وضيع

طعم في الصنارة والصيد ما عشاك

ؤ حيت بوق التغرير بلاك

ساذج مروبل والطمع داك

ها انت في لقفص محبوس والشاري نساك

فبشحال بعتي هناك

وشحال خسرتي من ايامك والهول خلاك

ففيق لا تورث ولادك ذلة يا ذليل

طعم لغذر حولك شبه بنادم عليل

عدتي طامة ...

والشيطان بحلاوة لغاه خذاك

بل خلي الاتي ب بفراحو يطل

تعم الفرحة المساواة والحق والعدل

ؤ ل بعتي انت راسك بزريقة او قرفية

فرطتي في الهمة وشدتي في الخاوية

فلا تورت جهلك ...

ولا تسوق وغباك

بشحال بعتي هناك..؟

*** الشاعر والزجال: أ. أحمد الكندودي *** المغرب ***

كل التفاعلات:

١١