ست ابوها
الواد ولد الغرقان
قابل ولد المحروق
واتفقوا على ولد البردان
لية ياغرقان
هو مافيش فى البلد
غير بنت المظعوط
ماانت اتقدمت قبلة ورفضوك
لهو انت كنت مليح وفاتوك
ياواد دى عايزة الفيديو والدش
اللى كان مهر جدتها
بلاص المش
وانت ياواد ياولد المحروق
كلمة تجيبك وكلمة توديك
لهو انت على طول مزقوق
وانتى يابنت المخووت
ارحمى الواد الغلبان
دة ابوكى من الفقر
نايم مفروط
وابوها
يقولك عايز مهر البنت
دهب ودهبات
لية ياابو عموا
دة المرحوم قبل مايموت
باع الغنمات
وامها
تقولك بنيتى عايزة
شى وشويات
لية ياخالة
هو البيت فية غير النخالة
دة لافية حفان سكر
ولا هبابة شاى
ولا بق لبن
ولا حتى شوية بتوات
دة مرار طافح
لما القوالب نامت
والنصاص قامت
لما ولد الكلاف عمل كبير
وولد العمد عن البلد غابت
ياواد ياشملول ياولد الشملولة
لية عايز تتلف وتتلافى
اللى مش ليك
دة بتاع الناس ياولد المحروق
عمرة مايغنيك
قوم ازرع ارضك باالقمح والفولة
وانتى ياست ابوها
يابنت المدلع
عيشى عيشة اهلك
دة باب بيت ابوكى
من الفقر متخلع
قال اية.غسالة وتلاجة
دة واد ابو قلة
فى الترعة بيغسل خلجاتة
ومن الفقر سنانة بيخلع
يابنت المدلع
وتلاقى فى البلد ياخوى
اللى عامل فيها الوااد لفندى
قال يعنى جدتة كانت
انديرا غاندى
محفلط ومتقمع وشعر ابوة متلمع
الفقرى ولد الفقرى
مش عاجبة فى البلد حد
عايز يتجوز .باربى وساندى
وتقوم من النوم يابوى
تسمع صراخ
الواد ولد ابو لمونة
سرق من امة.البط والفراخ
علشان السجاير والدخان
عقلة تاة وداخ
لاشغلة ولا مشغلة
ومع الفقر رماح
شوفتوا الواد قليل الحيا
واد جدك ابو الليف
اللى عامل نفسة ناصح
ودمة خفيف
فى خاشمة لبانة وبسكوتة
وامة علية طافحة الكوتة
فى الغيط ليل ونهار منكوتة
علشان توفر بتاوة ورغيف
شوفتوا الواد اللى جدة
ابو الليف
والله فى بلدنا ناس كتيرة
مليحة وتشرف
ناس بتقرا وتعرف وتتعرف
اللى زاد خير ارضة
وعمرة لاباع ولا جرف
والله لاكتب واقول
وعمرى لااكذب ولا احرف
بقلمى
محمد يونس
ليست هناك تعليقات:
إرسال تعليق