دهب ولا عيرة

 دهب ولا عيرة

الدنيا دى غريبة

تدى وتاخد

ومحدش برة الصورة

الوانها متلخبطة

ترسم وشوش كتيرة

دهب ولا عيرة

المزاد ابتدى

مين يشترى الطيبة

حيرة وبقت مرسومة

عين خايفة وايد مهزوزة

يا خوفى لتكون بقت عيبة

قلوب ماتت.. عقول تاهت

فى سكك كلها مقفولة

مين يدفع فى مزاد خسران

نهايته معروفة

دهب ولا عيرة

سيبنا من الطيبة

والحب بلا خيبة

افتح مزادك على الخداع

ولا كدب زى الحقيقة

زود عليهم شوية نفاق

تبقى الايام جميلة

الكل بيشترى

وبقت ليهم قيمة

دهب ولا عيرة

قطر ماشى بينا

بيوت وشجر بيهرب منينا

محطة وراء محطة

فى كل واحدة

بننسى اللى قبليها

مش سامعين ولا فاهمين

غير دوشة عالية حولينا

ناس نازلة وتانية طالعة

طريقنا لسه طويلة

عيون شايلة حكايات

خايفة تحكيها

يمكن يجى بكرة ينسيها

دهب ولا عيرة

العين فيهم مخدوعة

فين الفرق يا سادة

الدهب بيلمع وكمان العيرة

تحتار وممكن تنخدع

تشترى الرخيص

وتسيب الاصل على أنه عيرة

بقلمى… شريف القناوى

كل التفاعلات:

٣١٣١