حاسب على المشاريب
عامية مصرية
بقلمى ☆أشرف محمد السيد
☆☆☆☆☆☆☆☆☆☆☆☆☆☆☆
•إشرب يا شيخ قهوتك ، فيها اللبن سادة
الشاى تِقيل إنما ، بِْيعمر الطاسة
دنيا وفيها العجب ، ع الريحة وزيادة☆
•القلب فيه طبعها ، بُن وخُشاف وحليب
والعقل زينة ومرض من غير بَياض بيشيب
إشرب وسيب نصها ، سأسأ على الهادي
وإياك تقول للولد ، كنسل على المشاريب☆
•قاعد على دكته ، شاحب وخَس النُص
جَرار يغير حجر ، من غير سؤال بيرص
صاحب وقام يشتكى، والفكر كان غايب
راجل كبير يبتسم ،من غير جواب بيبص☆
•إتفضل إقعد هنا ، طاولة لعم الحج
شكلك غريب من هنا، قرفة وقهوة ف مَج
مرحب براجل جدع، طيب حليم وبشوش
صاحبى دَلَق قهوته ، سابها وتركنا وهج☆
•أسف يا شيخ العرب ، شكل البعيد مجنون
دنيا وفيها العجب ، زحلق بزيت وصابون
زهرك شديد إن كسب ، مبخت وضربة حظ
إسقينى من خيرتك ، نزل يا بيه ينسون☆
•بص يا اخويا الجدع ، شايل هموم خسران
صاحبك كواه الزمن، مزنوق ف حيط تعبان
مسكين ومن مشيتوا ، باين عليه القهر
إياك تجيب شهوتك ، ع الفاضى والمليان☆
•الشمس زى البشر ، تطلع تروح وتغيب
والرزق حق وقدر ، من غير نشان بيصيب
والزهر دش ودبش، تمسك بشيش ف اليك
مغلوب ويوم ما كسب ، قالوا عليه لعيب☆
تعالى حاسب هنا ،هديك كمان بقشيش
ساقع وساخن سلف ، سيبك من التنتيش
سلام على إللى فهم ، تسلم يا عمى الحج
راضى انا بقسمتى، هصبر وأنول وهعيش☆
•مش كل واحد طلب، شخلل وقام حاسب
ولا كل ناصح فتك ، دور وراح ناسب
مشروب فى سوق الأمل ، غالى وشحيح ورخيص
شبعان يموت م الشبع، راح للطبيب حاسب☆
&؛؛&؛؛&؛؛&؛؛&؛؛&؛؛&؛؛&؛؛&؛؛&؛؛&؛؛&؛؛&
بقلمي
أشرف محمد السيد
ليست هناك تعليقات:
إرسال تعليق