في القهوة
من قهوة لقهوة معديها
شكبة و ديمينو عاطيها
يجبد حيّة يفرح بيها
مسكينة تعاني وجيهه
*****
وجيهه في الدار تكتكت
توكّل و تشرّب و تشتشت
ولّت كي المهبولة توتوت
يزيد يرجع هو يبكّيها
*****
يولّي للدار منبوز
يفشّ غيضا بأولادا الزوز
غادي يشرب في القازوز
في دارا النعمة يرميها
*****
التِيتَرْ في القهوة حريف
مواضِبْ و يخُشِلْها نظيف
عامل كرسي ليه خفيف
عِيلَة و مَشاغِلْ ناسيها
*****
الصيني يحفر في لَجْبَال
يصنع مالحجرة مُعْقال
يبيعا للعربي الدجّال
ساكن في القهوة ماليها
*****
شعب قهاوي و شعب ربوخ
يهاب الساحر و البخوخ
تشطحلا نرمين يدوخ
يبيع الجبّة بلي فيها
*****
سي السيّد عامل باتمان
وجها كي قشور الرمّان
راجع منبرَّا شبعان
عشية في القهوة معديها
*****
يا سيّد يا بو لَولَاد
شِدْ دارك و اعمل عدّاد
ولادك أولى بالميعاد
نظِّم أحوالك و اسويها
*****
وجيهه قالت يا ويلي
الراجل متزوّج واقيلي
يرجعلي ليّالي حليلي
بالك في العُرفي معدّيها
*****
لا عُرْفِي لا همّ زمان
الراجل عدّاها دقّان
آش خصّا كان جا فنّان
راهو متوسِّد رُكْبِيها
*****
توّا راو تمّ المقصود
اعمل لخطاويك حدود
في القهوة ديما موجود
ها الحالة وين ماشي بيها
*****
حالة حليلة يا حضّار
و اللهِ عوج و دُمّأر
وجيهه تعمّر في الدار
و هو بالهملة خاليها
*****
لا هو حرام و لا عيب
أمّا بنظام و ترتيب
تلقا الصاحب و الحبيب
و رُد بالك لا تسكن فيها
الهاشمي البلعزي
في
11/01/2023
ليست هناك تعليقات:
إرسال تعليق