........مع السلامه.........

 ........مع السلامه.........

وانتي ماشيه لمي حاجتك

والساعات اللي ف عبايتك

لمي كل حاجه ليكي

وسلمي الأحلام لاختك

.......

والأماني والمحبه

واوعي تنسي منها حبه

لملمي الحزن اللي واقع

فوق شهورك وانتي حابه

.....

سيبي كل حلم ضايع

للي شايف حلمه راجع

واوعي تنسي تخدي منا

كل جرح فينا واجع

......

لملمي الايام وعودي

والكسور اللي ف وعودي

واقفلي تكة ساعاتك

وارحمي الحلم ف وجودي

......

دا الجديده شايفها هله

والجديده ليها طله

تفتح الأمل اللي قافل

واللي جاي متساب على الله

......

قادر الفتاح يغير

كل قديم ف عقولنا حير

يتمسح الماضي بظلامه

واللي جاي يصبح منور

......

يا اللي جايه علينا هلي

سكري الايام وحلي

غيري الطعم ف حياتنا

والجميل خليه تملي

......

يلي جايه قوام تعالي

هاتي كل عزيز وغالي

وابعدي الخوف عن حياتنا

وافرشي حلو الليالي

....محمد إبراهيم درويش......

عرض الرؤى

معدل وصول المنشور: ٢٢

٣محمود القطوعى، وارق ملاك وشخص آخر

٣ تعليقات

أعجبني

تعليق

إرسال