( قلب مفتوح ) :
هذه القصيدة قمت بنظمِها عام ٢٠١١ عقب إجرائي لعملية قلب مفتوح آنذاك :
رحت عملت اشعة إيكو
ورسم القلب ف ذات الوقت
ورحت على الدكتور وريتو
بص وقاللي دي حالتك زفت
قلبي وجعني كتير على وجعه
م اللي انا شايفه وم اللي انا سامعه
الدكتور ما اقدرش اراجعه
ده كلام طب اكيد بالظبط
لَّم اوراقي وقام حَوَلني
علشان شاكك في الشرايين
قاللي اكيد شريان مسدود
يمكن برضه يكونوا اتنين
قسطرتين ورا بعض اتعملوا
علشان يعرفوا تعبي منين
بالتشخيص عرفوها ووصلوا
قالوا محتاج لدعامة واتنين
في المستشفى قعدت ساعات
لاجل اركب الدعامات
الدكتور بص لي واستغرب
قال مش نافع وقتك فات
قلت يا دكتور قوللي وبوح
ما تزودش ف قلبي جروح
قال محتاج عملية كبيرة
قلبك فيها يكون مفتوح
قلت يا دكتور افتح يَلَّلا
كله بأمره وكله على الله
عمرنا م المكتوب ما حنهرب
ابدأ يَلَّلا وقول إسم الله
وبعد اللازم والتخدير
والتمريض ودكاترة كتير
رحت ف توهة أنا وغيبوبة
عملوا ما عملوا وسري ف بير
عدَّى كتير الوقت وفات
تِسَع ساعات في العمليات
أهلي وناسي واقفين ع الباب
قالوا اكيد الراجل مات
جِه التمرجي وقال مبروك
كل الشغل تمام محبوك
قفلوا الجرح خلاص واتلَّم
فكُْوا الشابِك مِ المشبوك
بعد ما فُقت وحجز رعاية
وعلاج خدت بكل عناية
أهلي خدوني خلاص ع البيت
كانت ثقتي بربي معايا
عدِّت كل مراحلي الخِطرة
ربك رب الكون له قدرة
كانلي نصيب في حياه من تاني
وحكايتي بقولهالكم عِبرة
وانا قدامكو معافى سليم
بكتب شعر بقلبي واهيم
ربك يُحيي وهوَّ يميت
يُحيي عظامنا وهِيَّ رميم
ربك بِحيي وهُوَّ يُميت
يُحيي عظامنا وهِيَّ رميم
جمال زكي عينر
ليست هناك تعليقات:
إرسال تعليق