شحات الغرام
دخلت مرة الجنينة
مليانة زهر واشجار
وخضرة وميه كمان
عشان القط رزقي هناك
هنا وهناك
لغاية ماشفتهم
ايوه دنا عيني بصتلهم
شلة ملايكة حسان
مليانين رقة واحسان
رجليا قصفت تحتي
وكدت هاوقع من طولي
وانا مستعجل ليهم
وماعدتش شفت طريقي
من نور الشمس اللي في عنيهم
وصرت اصرخ من وقتي
واقول لهم من مال الله ياحسناوات
دنا شحات الغرام
ومن سحركم قلبي مات
انت ياقطه ارجوك بصة
تنعش حياتي وتداوي فؤادي
وانت يابطة من مال الله
ضحكة لله
تجلجل حياتي وتسعد اوقاتي
أما أنت يافلفل شطه
كلميني حدثيني
خليني اشوف اللؤلؤ والمرجان اللي مصفوفين جوا ثغرك الفتان
٠٠٠٠٠٠٠٠٠٠٠
ياعمي روح العب بعيد
احنا مامعناش فكه
ربنا يبعتلك يامسكين
٠٠٠٠٠٠٠٠٠٠٠
لله لله ياحسناوات ياساحرات يافاتنات
اكسبوا فيا الأجر والثواب
انا بحب حوا وهي بتحبني كمان
دنا غلبان دنا تلفان
عايز حب وحنان
الحسنة بعشر امثالها
تكسبوا فيا الاجر والثواب
٠٠٠٠٠٠٠٠٠٠٠
يظهر ان الحلوات الامورات
انزعجوا من غلاستي
وتعبوا من غلاظتي
صاروا يصرخوا ويزعطوا كمان
ياعمي سيبنا بحالنا
ابعد عننا ربنا يخليك
هما يعدوا وانا اعدي وراهم
لغاية ماايد خشنة قوية
زي المزربة الحديدية
مسكتني من كتفي بعنف ووحشية
اتاريه شيخ الغفر ذو همه قويه
شدني خدني القسم معاه
وكتبوني تعهد اني ماخشش الحتة دية
واكلت نصيبي من البهدله والشرشحة القوية
وماسابونيش
الا بعد ماجاني العفو والسماح
منهن اه منهن بنات حواء
وطلعت من القسم اجري
ورجليا تسبف خطوتي
ومن يوميها بطلت أرقص وأغني وأقول
دنا شحات الغرام
( كما ان الممثل يجيب ان يجيد اداء كل الادوار كذلك من يكتب الاشعار يجب ان يلون في ادواره لاتظنوا انني شحات الغرام لكن ضرورة الشعر لها احكام والسلام )
عارف البديوي
ليست هناك تعليقات:
إرسال تعليق