كله بيسأل بهية
مين قتل ياسين
مش هيا دي القضية
ياناس ياكويسين
القضية هيا بهية
مين طفّي البسمة
اللي علي شفايفها
مين اللي هانها وخانها
وعامل مش شايفها
مين سقاها الفقر
مين دوّقها القهر
وشال منها الصبر
مين اللي دوّخ أهلها
مين اللي صَعّب سَهْلها
مين اللي ماشي ف ضلها
ومين اللي راح يضلّها
ومين اللي جايب حقها
آه من بهية وعيون بهية
عَز الحبايب غالية عليا
فداها روحي فداها قلبي
فداها عنيّا
بهية خيرها ياناس كتير
أزمة بهية قلة ضمير
أزمة بهية قلة عمل
أزمة بهية ف زرع الأمل
المحتمَل
أزمة بهية ياناس الحب
تاخد مكانها ف نبض القلب
أزمة بهية ف التغيير
محنة بهية ف التطوير
أزمة بهية أزمة ناسها
أزمة بهية ياناس إحساسها
مش مشكلتها قتْل ياسين
مشكلتها البني آدمين
أكيد عارفين
قتلة ياسين
اللي خلّوا القلب حزين
توب الحداد وَلِّد عناد
بالاتحاد ويّا الجهاد
حتعيش بهية
عيشة هنيّة
وتبقي هيّة
فخر البلاد أم الولاد
اللي يجيبو حق ياسين
أكيد حيجيبو حق ياسين
هشام سليم
كنج العربي
شاعر الحرافيش
أعجبني
تعليق
إرسال
ليست هناك تعليقات:
إرسال تعليق