(امل كداب ) :
قالولي الناس
ده حبك راح على الفاضي
خلاص سابك ومش فاضي
وقلت لهم بتشمتوا ليه
حبيبي وبرضه قلبي عليه
وبالمكتوب انا راضي
وقلت مسيره يرجعلي
واجري عليه ويندهلي
وآخده بشوق في أحضاني
وترجع فرحتي تاني
طلع كداب مالوش أحباب
لا فكر فيا ولا جاني
داريت الدمع في عيوني
من الناس اللي لاموني
وقلت ده مهما هيطَوِّل
ده عمره ف يوم ما يتحوِّل
وهيجيني يناديني
نعيد العمر مِ الأول
لقيت نفسي بعيش أحلام
وسايب نفسي للأوهام
وبوصل في حِبال دايبة
وروحي برضه مش تايبة
عن الماضي وعن ذكرى
آسيت فيها جراح وآلام
وقلت أعيش يومي بيومي
وابدِّد حزني وهمومي
وأقفِّل عندي اي حساب
يفكرني باي عذاب
وأبطل اعيش أمل كداب
وأفوق من غفلتي ونومي
وكان لازم أشوف نفسي
واخلص روحى من يأسي
والملم همي واسايا
واداوي جرح جوايا
وأنسى زماني والماضي
وأنسى اللي جرى ف أمسي
وأنسى زماني والماضي
وأنسى اللي جرى ف أمسي
بقلمي الشاعر جمال زكي عينر
ليست هناك تعليقات:
إرسال تعليق