ياقطر سارح طول الليل
شد الحزام انا متشوق
صبح علينا ب لحن جميل
خلينا نرتاح و نروق
***********-
يسعد صباحك يا حبيبه
يا حته من روحي قريبه
صباح جميل ماليان افراح
أسوان بلاد كلها طيبه
************-
يا نجمه فوق و قمر وناس
عشق و دفا و غرامك كاس
يا شمس نورها ب يملاني
أكبر أمل وأجمل إحساس
***********-
لو جانا برد ..... تضمينا
نعيش في حضنك يحمينا
نعشق محبتنا... ف أمنك
و لو عطشنا ... ب تروينا
***********-
نسكر ب طعم لزيز حادق
نهرك جمع مليون عاشق
يا لحن غنوه و كام موال
عشقك دوا ف الروح راشق
***********-
طيبك تمللي ده مسك و فاح
أشبعش منه ف مسا و صباح
كحلت .... في ترابك عيني
نورك على الأكوان.. اهو لاح
************-
أما الكرم ف الطبع أصيل
سكر قصب و التمر نخيل
و الشمس نار ما بتحرقنا
ولا حد فينا ف أهله بخيل
***********-
جمع لكل جميل .. ليلك
و كل حُسن ب يعني لك
ولو سألتي هقول عراف
شربت شهدي انا من نيلك
************
حسن حفني
ليست هناك تعليقات:
إرسال تعليق