عاش الملك.. مات الملك..
والبهلوان وسط الميدان..
عمال بيرقص زي زمان..
مهو بهلوان.. مش فارقة وياه الملك..
عاش الملك.. مات الملك..
البهلوان انسان بسيط..
لكنه عمره ماكان عبيط..
عارف مكانته بين الصفوف..
عايش حياته ضعيف في خوف..
بس قدام الظروف.. لازم هيرقص للملك..
مهو بلهوان وبزمبلك..
عاش الملك.. مات الملك..
البهلوان له ألف صورة..
تلقيه معاك في كل حته..
تلقيه في شارع أو مقصورة..
طالع معاك في كل لقطة..
لكنه عمره ما كان جبان..
هو ضعفه م الزمان..
بيخاف يبان وسط المكان..
لحد يلعب في الزمبلك..
مهو حكمته..
عاش الملك.. مات الملك..
....
ايمن شتا
ليست هناك تعليقات:
إرسال تعليق