بركه ونور..
عبدالله رجب ابوعدنان
أمي و جيرانها
متغلبة على أحزانها
وللخبيز مستعدين
اللي تسامر واللي تغامر
والبيت بالحب عامر
وانا صغير فرحان وبلعب ب العجين
وخالتي ترحرح
وعمتي تذكر وتسبح
وف صلاة النبي تمدح
وريحة البتاو تسر العين
وعملتلي عرقانة
وف همومها غرقانة
صوره ب أمانة
مرسومه ع الجبين
وانا ادندن أشعاري
واراجع أفكاري
وف صبحي و نهاري
وفرن أمي بيدفي المكان
بالشوق و الحنين
يقولو حديت ويحكو
م الأزواج بيشكو
وساعات يغنو و ساعات يبكو
وبنصيبهم راضيين
بركه ونور
وعجين ف الماجور
وتوزع السرور
لكل الموجودين
ولمه و هيصة
يا محلاها عيشة
ولا الحوجة دالوقت للفرانين
وكبر العمود
واشتد العود
وراحت عمتي وخالتي
وما فاضل غير أمي
لسة قادرة تدي
وبينا تعدي وجع السنين
واللقمة لو حاف
لكن عمرنا ما نخاف
وشوية مش والوش هوا الوش
لا كدب ولا غش
وكل أهل بلدي من قلبي متشكرين
ناسييني مع إني معروف
وف كل شوارع الحاجر بطوف
حبكو ليا تشريف
ما انا شاعر الغلابة والشقيانين
بركه ونور..
عبدالله رجب ابوعدنان
ليست هناك تعليقات:
إرسال تعليق