ضَيّ القمر
لسّه صاحي ولّا نمت
طول عمرك تحب السهر
ولّا أيه يظهر كبرت
ما بقتش تشتاق للقمر
كنت بالمح لون عينيك
بيدوب ف ضيّه
ما انت زيّه بس شبت
ضَيّ القمر لوّن ف شَعرك
وف مشاعرك فاستوت
لسّه بتسمع عب الحليم
والسِت
لسّه بتحب القديم
لسّه بتحس الألم
من جرح منسي
لسّاك رومانسي
لسّه بتقيد الشموع
جوّه ف أوضتنا
وف بلكونتنا بترش الدموع
على ذكرياتنا
لسّه خيالك برضه طاير
ما أنت شاعر
بس ليه الفكر حاير
مابين قديمك والجديد
مانتاش سعيد
من يوم ماسبتك وانت ليه عايش وحيد
مالقيتش زيي
مانت مش هاتلاقي زيي
مش كنت بتقولّي كده
كنت باحس بالرضا
وباصدقك
مش غرور
كنت فى فَلَكَك بادور
زي الفراشة وكان كلامك ليّا نور
سيبك م الكلام ده كله سيبك
عشت عمري وخدت ف الاّخر نصيبك
أنا جاية باترجاك ماتنسى
بس الحياة والعمر لسّه
ماتعيشي عمرك جوّه ذكرى
عيش أماني
يمكن ف بكرة وبعد بكرة
تحب تاني
مانتاش أناني
وما يرضينيش تعيش عشاني
هامشي واسيبك
بعد ماطمن عليك
واعرف ان مافيش جديد
أقفل الباب الحديد
واطفي نور السطح شيش البلكونات
عيش سعيد
بس أيّاك تنسى اللي فات .
شعر . ...
حسام بخيت
ليست هناك تعليقات:
إرسال تعليق