* * * عيونك بحر * * *
عيونك ليه وخداني
لأحلامي وشداني
وأشعلق بيكي وجداني
أخاف يوم لتنساني
وأدوق المر
عيونك بحر شطه بعيد
يخدني بشوق مع التنهيد
أدوب وأسرح بلمسه إيد
أحس إن وصلت البر
وأنا بغرق كل يوم أكتر من الأول
أعوم وأسبح ألاقي الشط
لسه بعيد يمكن أبعد من الاول
تقولي الصبر
منا صابر أنا مؤمن ومش كافر
أنا شاعر للعشاق بقول أشعار
ولو قلبك في يوم يعطف
وإحساسك في يوم ينصف
هتقولي إن زي نزار
بأقولك شعر
عيونك كون فيها المعنى
والمضمون لكل أصول العشق
عيونك رزق إللي يشوفها
وكأن مهموم يحس بفرق
عيونك دي اللي اتولد فيها
كل طقوس السحر
عيونك بحر لأ أكبر
لأن البحر مش ممكن
في يوم يقدر يدوب
فيه كل بحور الشعر
عيونك هوا عيونك سما
عيونك نسمه بتهفهف
في ساعه حر
عيونك هزو أوتاري
عيونك سحر مداري
سرق مني كل حروف الشعر
بقيت كل أما أكتب شعر
أو قصه احس ان يدوب لسه
بتهجه وبتعلم كتابه الشعر
أحس أن حبيب هايم بحبه
ولسه مستني يحوش مهر
وأشوف إن أنا العاشق
بوجداني بلون تاني
وأخاف لحظه تسبقني
سنين العمر
وأشوف إن أنا العابد
وانا الدرويش وانا السكران
وانا الشربان لكل كؤوس الخمر
وأنا المجنون بأوهامي
وأنا المسجون بأحلامي
لأني مشفتش عيون تاني
تعلمني معاني الصبر
لأن عنيك شدتني
لدنيا خديده وخدتني
وأحلامي بتتسرسب
فجأه لقتني وأنا بكتب
بقيت في خريف العمر
ليست هناك تعليقات:
إرسال تعليق