آهات الحيارى
ــــــــــــــــــــ
باسم آهات الحيارى
باسم أهوال السنين
باسم أوهام الحضاره
في دموع المظلومين
باسم أطفال الحجاره
باسم أقصانا الحزين
باسم بغداد و الأماره
ع الهَوان دنيا ودين
باسم الشَّتات والمراره
باسم أمِّة المحتارين
يا قلوب نوحي بحراره
يا ألم احكي الأنين
إحكي حكايةْ أمَّه
الليل عليها طال
منزوعه منها الهمَّه
شايله المآسي جبال
تحلم بالفجر ييجي
من قلب الليل لِوَحْدُه
والليل عنيد وعايز
فرسان تتْحدَّى عِنْدُه
احكي حكايةْ أرض
مزروعه فيها الآه
تصرخ تِهز الأرض
يا عدل حكمك تاه
ابن العِدى مِتْصاب
وابن الدِفاع ارهاب
يا عَدْل يا كداب
اشكيك لِعدْل الله
احكي حكايةْ شعب
قلبه نَزف أهوال
ليله ونهاره في كرب
أجيال ورا أجيال
الكل عايش حرب
في موْطِنُه رحَّال
كاتِم أنينُه غَصْب
واهُو حال يسلِّم حال
احكي حكايةْ دار
كانت بناسها عمار
لَمِّت صِغار وكبار
كانوا في أمان عيشين
سَطَى عليها لصُوص
بادُوا آمال ونفوس
يا عَدْل يا محْبوس
مستنِّي كلمة مين
احكي حكايةْ طفل
راسم ملامحه الوِيل
شايل هُمومُه حِمْل
الصُّبح ويَّا الليل
خَطَف العذاب فرحِته
قَطَف الأنِين بَسمته
خَطّ الغضب سِكِّته
جُندي برُتْبِة جِيل
احكي وقول يا ألم
إحنا علينا اللُّوم
أشْتات ما بين الأُمَم
نَيْمِين وطال النُّوم
تايْهِين في كان يا ما كان
لاهْيِين في كل مكان
وآدِي الهوَان ألوان
سَبِينا يوم ورا يوم
سَطوْ الأفاعي صعب
بين الحشا جوَّال
في كل حاره ودَرْب
زرع الوطن أطْلال
والظُلم ماله قلب
يرحم أنين أطفال
والدنيا شرْق وغرْب
تحكي السلام موَّال
أقصانا يا حزين
يا ابو الآدان نُوَاح
دمعه في كل عين
وفي كل قلب جراح
يا ابو النِدا يقين
حيّ على الفلاح
اصْبُر على السنين
حييجى يوم صلاح
يا ضمير الكون كفايه
غِبْت عن دنيانا ليه
قُلِّي ايه هي الحكايه
إنت ميِّت ولاَّ ايه...؟
يا شُعوب قولي معايا
العروبه ساكته ليه
د احنا رَيحِين للنِّهايه
والبدايه تايهه ليه
دالبِدايه كِلمه وَحْده
والعَدو مَقدور عليه
وِحْده تِجْمع أمّه وَحده
وِحْدَه تِنْهي ازاي وليه
يا أمِّتي آن الأوان
واللا دا آين من زمان
نِنْسَى الخِلاف نِنْسَى الهِتاف
إن كنَّا عايزين الأمان
نِنْسَى الحدود نِنْسَى السدود
يللا نعود ونعيد زمان
إيدَك في إيدي يا حُرّ يللا
يللا كفايه ذُل وهَوان
__________
محمدإمام
ليست هناك تعليقات:
إرسال تعليق