النوم خاصمني ولا بيدي

 النوم خاصمني ولا بيدي

وهواه ليلاتي يبات عندي

بستنى طيفه اما يعدي

وبقول هشوفه واكون مرضي

دانا عقلي بيجيب ويودي

لو مره يوم عندي يهدي

وتكون عنيه ملكي لوحدي

بحنان ايديه يلمس خدي

وف بحر عشقه يا خلق اعوم

لو هل بلقى معاه سعدي

وبكون كمان مش على بعضي

ف عنيه بشوف الكون وردي

خايف لاكون عديت حدي

احلامي دي مش على قدي

ويكون حبيبي يا ناس مادي

مانا اصلي غلبان على قدي

معقوله بيا يحس ف يوم

لو كان عليا اجيبله الكون

من كل شكل وصنف ولون

ملك سليمان او مال لقارون

والروح تشيله وقلبي يصون

واروح وراه مطرح ما يكون

شمال يمين واعمل حلزون

ده عشان حبيبي العمر يهون

ويهون كمان ف هواه اللوم

بحلم يا ناس والحلم جنون

لو يوم تشاور احلى عيون

وتقوللي دانا عشقاك بجنون

لادق طبل ورق وهون

واجيب كمانجه واكسليفون

واتنين شهود ويا المأذون

ونزيط كده ونعلي التون

ده حبيبي صار قدري المقسوم

بقلمي/ خالد جمال ٢١/٤/٢٠٢٤

عرض الرؤى

معدل وصول المنشور: ٦١

كل التفاعلات:

٤فهدالصحراء الجرئ، وشهد ملاك محمد وشخصان آخران