ساكنة القلب ***

 ساكنة القلب ***

وحدك ساكنة القلب

بغاك نتي...

ؤ في غيرك ما رْغَب

لعقل والرزانة والمرونة

صادقة واعية حنونة

الطيبة والظرافة والحب

بصح قالوا لغرام بالشكل ما يَتَعْبَر

لا بالمساحيق عري ؤ قطع ؤ زيّر

لهوى إيمان

صدق وأمان

وعد ب لوفا ما يتبدل ما يتًقْلَب

حورية نتي وغرامي

بك نورت فرحتي وَحْلامي

كرمة الخير ...

والصفا من يدك فاض دْفا ..

ومن كيسانو تلذذ وشْرب

حبك غْلَب

عدتي نوارة

بنقاك ما بقات خسارة

هديتي برج الجوف مقام ...

وشموسو ما تغيب ما تغرب

وحدك سكنتي لقلب

حبيبة وخليلة

ما تغريها اشكال ولا انطوت عليها الحيلة

شادة في حشمتها ؤ دينها...

وعن لْحياء ما فرطت وحماها الرب

بصح الزين فعل ما هو زواق

اساسو عفة لا سلعة ونفاق

بغيني نبغيك بلا وسواس ...

بلا شوك بلا زْرَب

ونتي سرب من لحكايات المريحة

ما بدالة ما غدارة صافية صريحة

بك كملت الفرحة...

وبهواك وتر الشريان غنى وطْرب

وحدك ساكنة القلب

*** الأديب والشاعر: أحمد الكندودي ***المغرب

كل التفاعلات:

٢٢