ياست الحبايب
قلبي
في هواكي دايب
ويحق له يدوب
ماإنتي الحبيبة
وإنتي الطبيبة
وإنتي الدوا
لوجع القلوب
وإنتي الفرحة
وإنتي الشجرة
اللي طارحة
ومضللة علينا
من الحر بتحمينا
وفي البرد بتدفينا
قلبك
ستر وغطا علينا
وياما سترتي عيوب
وإنتي البشوشة السمحة
ودايما مسامحة
وعمر وشك
ما كان مقلوب
وإنتي الكريمة
اللي دايما فاتحة
حضنها لينا
وبتفكي ضيقة المكروب
وإنتي العظيمة
اللي علمتينا
وكبرتينا
وخضتي معانا حروب
وإنتي الصابرة
اللي إتحملتينا
وصبرك فاق
صبر ايوب
برك فرض علينا
ومكتوب
وحبك سند لينا
وحضنك حصن بيحمينا
بدعوة منك
تهون كل الخطوب
يا نور عينينا
رضاكي علينا
هو بس المطلوب
أحمد السعيد الفقي مصر
ليست هناك تعليقات:
إرسال تعليق