=======ايه اللى فاضل ===
------------------------------
ما فضلش غير حبة سنين
وشهور وجع وجمعة انين
قبل ما اشوف عينيكى الطيبين
الا لما يشوف شموسك والحنين
كنت با اكتب شعر وارسم نجمتين
واحلم انى الحقك والحق عينيكى الدفيانين
الجرح كان ينزف ألم
وجراح حيرانين
وانا بالضى النبى اجرى اخضر ضفتين
آلضم هواكى جوا قلبى واضفر ورتين
واجرى المس نسمة فايته فوق شفتين
واحلف اشوفك
واشوف فى عينيكى شمسى
واستهجى البسمتين
واستهجى خطوتى
انا والصبح وايديكى العرقانين
ندق باب الحياة ينفتح
للصبح ضرفتين
احلم باملى يكتمل
ونقطف من الجنة عناقيد امل
اعصر حبيبتى من قلبى قبل
ايه اللى حصل
الريح كات تسابق خطونى
والروح لعندك ترتحل
انده عليك واستنى منك الخبر
صحى اللى نام جوا تعاشيق الشجر
انا كاتب اسمى مع اسم القمر
مين اللى ساوم ع الرحيل
وباع حلمى لريح الخطر
كل الادلة والتهم بتحكى وتستخبى فى القدر
عشرين سنة
والضحكة مصلوبه فى الوشوش الحجر
عشرين سنة والعناوين كلها ما لها اثر
الوش عجز م الهزايم والقلق
كم سطر فى كتابنا اتحرق
ولسه حكايتنا بتنسكع بره القفص
لسه مشتاقين للغنا
ولحضن يدينا الدوا
رغم الجراح ضاربه فى جدور السما
الجراح بتنخر فى شقوق الزمن
والضى اللى كان حر اتسجن
------------------------------محمدعبدالمقصود داود
ليست هناك تعليقات:
إرسال تعليق