==حالة جميلة
----------------------------
لما تشوفها يوم صدفة
لما الصبح يرمى لك صوتها
لما النسمة تمر بلهفة
لما الشجر الواقف من مدة
تحكى عصافيره قصة
لما تكون فرحان يكون للفرح رصة
والدنيا تاخدك فى احضانها من غير غصة
والحالة تسمح لك تحلم
فتاخد روحك ع الكورنيش
او شارع طيبة
او كامب شيزار
يا ه على دا نهار
افراحه مش عاوزة هزار
ح تحس بروحك طايرة طيران
وتقرب منك دنيا الفرسان
انا عشت كتير مهزوم
يومى بيصاحب م الهم هموم
والقلب من حزنه مقسوم
آه لو يوم صدفة اشوفها
وتضحك وتدارى فى خوفها
وتبعد م الشارع ومعها نصيبها
انا كنت حبيبها
بس الحلم خاصم عمرى وخاصمها
اياك تسأل يوم عن حالها
مش من حقك
انت تعيش على عشقك
وهى بعيدة عن عشك
لما تشوفها يوم صدفة
لما الصبح يرمى لك صوتها
حالة جميلة
بس اوعى تانى تغشك
------------------------مجمد عبد المقصود داود
ليست هناك تعليقات:
إرسال تعليق