مجلة نداء الرؤح لفرسان الكلمات

 قصيدة / العزومة

{ عامية مصرية. } بقلمي/ أشرف محمد السيد

""""""""""

""""""""""

* معزوم و عازم ع الكلام

من غير طيور من غير حمام

و اللحمة فاكر شكلها

بس الحلال كارف حرام *

* العيشة جمرة مولعة

و الفرخة جامدة مهكعة

أسعار تمصمص ف الجيوب

و البامية قال متأمعة *

* الفاكهة غارت م الخُضار

و البُلطي ماسِك ف الوقار

و العدس خالع جِبتوا

حتى الرغيف ذُل و مرار *

* فقر و مصايب كل يوم

شد الحزام بيع الهدوم

البغل طافح ، لقمتي

خليك شريف إخشع وصوم*

*يا إللى إنت غاوي المرمطة

تفرح تموت ف المليطة

تسرق و تشتم ف الشريف

و البغلة سافة مرهرطة *

* عيشة و دايبة ف القرف

والقرش شخرم و إتصَرف

والديك بيدن بص شوف

مسكين من الفُجْر إنحَرَف*

* حاسب حساب المدعكة

كاره أُمور السهوكة

شايف عبيط ساحب عبيط

راضع كلام الهمبكة *

* غلبان وماشي جوا حيط

بعمل فصيح بعمل عبيط

مهموم و شايل همهم

حطوا البلاوي ف الغبيط *

* الإبرة سَدِتْ خُرمها

والجزمة فكت نعلها

والفحل نايم ع السرير

خايف يبص ف وشها *

* الجوع بيزعق ف البطون

والطير مبرشم ع الغصون

و البطة رابطة وِركها

يمكن تعدي أو تهون *

* شاكر و حامد ربنا

و القبر جنة تضمنا

بكفاية نوح يا إبن السئيل

فعلك وقولك شلنا *

* إكبس وحَوٌَط ع الجميع

إياك تفرط أو تبيع

الباغي ظالم مُفتري

فاشل وعاتب ع الربيع *

* إبني القصور فوق تُربتي

إسجن أخويا وعمتي

إكدب و طبل للحرام

راضي بنصيبي و قسمتي *

* هشرب المنقوع و قايم

عقلي صاحي و حالي نايم

والخلاصة طبع غالب

مش وليمة أو عزايم *

بقلمي/ أشرف محمد السيد ☆

عرض الرؤى

معدل وصول المنشور: ٣٦

كل التفاعلات:

٣Tghred Ahmad، وEsteer Hanna وشخص آخر