====مش زيهم =============
************************************************************
مين اللى قال انك زيهم
مش زيهم
ولازى البنات اللى مالى عبهم
ضحك وسهر
انتى القمر اللى يِصحى فى العيون
حب وخير للبشر
يكتب غناوى للمصلوبين على جسر القدر
انتى الحمام اللى ساعة مغربيه
يهرب لاقربها غيه
يرمى دفا النهار فى صدور صبيه
يمسح ملامح حزنهم بادين عفيه
فيضيع تعب الانتظار
ويتمدد على بابنا نهار
يصد جيوش الهم والاشرار
مش زيهم
مين اللى قال انك زيهم
انتى الربيع اللى يغزل شمسهم
ايد بتلم فرحة امسهم
وتنسج خيوط حلمهم
نبضةرضا وحنان
بتتهجى الامان
ولقا فرحهم
شوق مغزول باامل يضمهم
انتى الندى فى الصبح يبلمهم
يغسل براح جرحهم
مش زيهم
عيونك غير كل عيون البشر
فى الليل كنت اسهر على ضيهم
احلم بقلوب ما تعرفش الوجع
ترطب القلب الحزين
اللى سافر لجناينهم بس ما رجع
مش زيهم يا بنت عمرى اللى اتوجع
من يوم ما غبتى
قلبى ما عاد جدع
-----------------
هامش
-----------------------
ممنوع على اشوفك
ممنوع اهتف بااسمك
ممنوع من كل حاجة
وبكل حاجة باحبك
==================محمد عبد المقصود داود
ليست هناك تعليقات:
إرسال تعليق