يا عم صلي الفجر حاضر
ماهو ده اللي قاعد وده اللي فاضل
لخلق خافت ربها كت ناس افاضل
ده مهما طال العمر بينا
مكتوب علينا
راح ييجي بكره وهنبقى ذكرى
مافيهاش ساعتها فرصة تانية
ولا حتى ثانية
لحد قال هل من مجال
لعودة تاني بعد الزوال
أو كان مجادل
كله بميزان
مافيهاش يوميها ده ابلكاش والتاني زان
ولا حتى فيها انا خالي مين ولا عمي كان
ربك هيبقى فينا الحكم
مين زيه عادل
لا تقول مقدّر وياريتني أقدر
اصلي اتعودت على السهر
وبنام مأخَّر
نومي نوم تقيل
وبنام قتيل
وإن قمت غصب
ده هيبقى صعب
وهاقوم مكدّر
لا تقول عليل من غير دليل
لو عِلّه فيك ووجعك ماليك
لو حتى من كتر الألم
فاض يابني بيك
لو جثه هامده فوق المخده
صلي بعنيك
ده فرض ربك علينا مين عنه يتأخر
صدقني صلي يومين تلاته
واكيد هتتعوِّد
زي اللي ينوي حفظ القرآن
بعديها بيجوِّد
بس انت انوي نيه خير
لا تميل ولا تحوِّد
هتلاقي نعمة وخير كتير
في الجاي والحاضر
هفضل يا عم اكلمك واقول واعيد
وفيك حبيبي على طول هنبِّه
دايما لوجه الله تعالى
مش عشان المعرفه
أو حتى كنت عليك بشبِّه
هتلاقي ربك ليك معين
ما تقول آمين
هيصحي فيك من غير منبه
ينده عليك وتقوله حاضر
يا عم صلي الفجر حاضر
بقلمي/ خالد جمال ٢/٣/٢٠٢٤
ليست هناك تعليقات:
إرسال تعليق