ماليش بعدَك

 ماليش بعدَك

ماليش بعدَك يا ضي العين

ماعيش العمر يوم بعدَك

مفيش منك وزيّك فين

ماجاش قبلك مفيش بعدك

ده لو تبعد يومين اتنين

بيكويني لهيب بُعدك

ولو جمبي وقصاد العين

بتوحشني وبشتاقلك

ومين غيري هيخلص مين

يكون سندك يصون وعدك

هواك شايله ف نن العين

شاريك القلب ومواعدك

مناها الروح ترد الدين

تصير فرحك تكون سعدك

تكونلك بسمة ع الخدين

نسيم شردك دفا لبردك

وف الشده

كف ليك بيعين

تشيل حملك تكون ساعدك

ده مهما تمر فينا سنين

ومهما البعد كان واخدك

محال هيفض ضم ايدين

محال تمشي الطريق وحدك

هواك عود فل على ياسمين

عبير العمر من وردك

ماليش بعدك

بقلمي/ خالد جمال ١١/٢/٢٠٢٤

عرض الرؤى

معدل وصول المنشور: ١٦

كل التفاعلات:

٣٣