معنى الوطن ــــــــــــــــــ

 معنى الوطن

ــــــــــــــــــ

هوَّ إيه معنى الوطن؟

حضن أُم أمن وسكن؟

أمل وحلم فرحه وشجن؟

فرض وعرض هوِّيه ودين؟

شرف ..حَمِيَّه ..حنين؟

ابحث و دوَّر وطوف

ف المعانى و الحروف

فى العقيده و الأديان

فى الأماكن و الأزمان

فى الحدود فى الجدود

فى الوعود و العهود

فى الليالى و سحرها

فى القوافى و شعرها

فى الأولاد و الأعياد

فى الانكساره وفى الأمجاد

صفح قلوب الناس

و عيش حلم الغلابه

فلسف غلاوة الماس

و افهم معنى الطيابه

حس الشدايد و المحن

اقرا الثوابت و السنن

عشان تعيش معنى الوطن

أصل الوطن لا بيتقال ولاينشرح

ولا يندرس فى حصَّه و درس

معنى الوطن بيه الكيان ينشرح

بقلوب الوفى يتحس وبس

فى غيرة فارس ع الأعراض

و همة حارس ع الحدود

ولهفة غريب للخليله والولاد

و حِنِّ العجوز للأحفاد والجّدود

فى عصْرةْ قلب فى شدِّته

ودمْعةْ فرح فى نصرته

و روح تهون لو يوم طلب

و شوق يرفرف ويَّا العلم من سطوته

مفيش فى حبُّه معنى التَّردُّد

و لا يقبل فى الوفى ألوان

حبُّه عقيده يا أبيض يا اسود

ملعون الشريك فى هوى الأوطان

لو كان فى قلبك حب الوطن ماكن

و روحك تطوف بمطارح عزِّته

وحاسس بنبضه فى الكيان ساكن

و عَبْرِتك تُعْبُر معاه فى سكِّته

و كنت درعه الحامى فى المحن

تبقى عرفت معنى الوطن

___________________

الشاعر. محمدامام

ــــــــــــــ

كل التفاعلات:

٣٣