بيكيا
بنشتري كل القديم
كراكيب سنين
كل اللي عدى وعلينا فات
بنشتري برضه الشهامه
ونخوه رافعه للحق هامه
بنشتري حتى الملامه
بعتاب بيبني مش بيأذي
ومايقلِّش للناس كرامه
قلوب بتفرح مش بتجرح
م الفرحه تلقى عيونها باكيه
بنشتري لو نفس راضيه
تسعى بحلال على رزقها
مش خلق فاضيه
قلوب تخاف على بعضها
مش ناس معاديه
دايما بتحمد ربها
مش لاعنه شاكيه
بنشتري وبأعلى سعر
صدق الكلام والاحترام
وقلوب بتوفي
مش خلق هايفه
م الحق خايفه
او للحقيقه ليل نهار
عمّاله تخفي
ايدين تئيد شمعه ف ظلام
مش إيد بتطفي
بنشتري
ناس كلامها يكون ف ضهرك
زي وشك
ومحال تغش
مش عشان المصلحة تلقاه يلاوعك
أو يغشك
ليه ألف وش
وعودها صادقه وكلامها فعل
مش ناس بتخلف وعدها ومعاك تقل
قلوب تكفر بعضها مليانه غل
اللي ف ضميرها وقلبها
بينطقه
على طول لسانها
بيبان كمان على وشها
بنصدقه
وعيونها حاكيه
بنشتري ايام زمان واحلى
ذكرى
بيكيا
بقلمي/ خالد جمال ٢٧/٢/٢٠٢٤
ليست هناك تعليقات:
إرسال تعليق