الاحساس نعمه
يابني الاحساس قالوا عنه زمان
فضل و نعمه
والذوق مش عيب ولاضعف كمان
او ليك وصمه
ولا طولة البال تتسمَّى هوان
ف الروح قاسمه
دي الكلمة بتمحي كتير احزان
وتزيح ازمه
وإن تقلت ما تنطقت بلسان
تكفي البسمه
وسكوتك بدل القول بهتان
اعلى واسمى
خليك ف الصهد هوا الحرّان
زي النسمه
شيل شالك حُطّه على البردان
ده مناه يدفى
وإن عينك وقعت على تعبان
ساعده ف لحظه
واللي بيشتكي صد وحرمان
ادّيه ورده
ده اللي بيدِّي هوّه الكسبان
روحه بترضى
واللي بيدّارى خسيس وجبان
فيه الروح شارده
احساسنا ببعض ف كل أوان
اكبر نعمه
واجمل صفه زاينه بني الانسان
هيه الرحمة
بقلمي/ خالد جمال ١٦/١/٢٠٢٤
ليست هناك تعليقات:
إرسال تعليق