بُكْرَه تِتْعَدِّل ـــــــــــــــــــــــــــــــــــــــــــــــ

 بُكْرَه تِتْعَدِّل

ـــــــــــــــــــــــــــــــــــــــــــــــ

هُمُوم النَّاس مَاهِيش دَايْمَه

وَلاَ مَرْكِب بَاتِت عَايْمَه

مِسِير الفَرْح يِغْسِلْهَا

وِيِيجِي يِعْدِل الْمَايْلَه

وِبُكْرَه جَاي وِتِتْعَدِّل

وِحَال النَّاس بِيِتْبَدِّل

وِيَامَا حُمُول وِبِنْشِلْهَا

تُرُوح مَعَ غِيمَه كَات غَايْمَه

صَحِيح القَسْوَه دِي مُرَّه

وِصَعْبَه كِتِير وِلَو مَرَّه

حِبَالْهَا إِحْنَا نِفْتِلْهَا

مَا نُخْرُج مِنْهَا بِالْمَرَّه

صَنَعْنَا الْحُزْن بِإيْدِينَا

وِشَالْتُه قُلُوبْنَا وِعْنِينَا

وِسَهْل عَلِينَا نِعْدِلْهَا

مَا دَام بِالعَفْوّ عَدِّينَا

وِلِيه فِي الْحُزْن بَيِّتْنَا

وِعِشْنَا الدُّور بِلَمِّتْنَا

خُيُوطْنَا السُّودَه نِغْزِلْهَا

وِفِينَا العَدْو شَمِّتْنَا

هُمُوم النَّاس مَاهِيش دَايْمَه

وَلاَ مَرْكِب بَاتِت عَايْمَه

مِسِير الفَرْح يِغْسِلْهَا

وِيِيجِي يِعْدِل الْمَايْلَه

ـــــــــــــــــــــــــــــــــــــــــــــــ

كلمات الشاعر أحمد شاهين

----- مصر -- أسيوط -----

عرض الرؤى

معدل وصول المنشور: ٦١

كل التفاعلات:

١الشاعر أحمد شاهين