زجلية تحت عنوان :***سمع ***الشاعر والزجال: احمد الكندودي ***المغرب ***

 زجلية تحت عنوان :

***سمع

سمع

شد في الله

ديرو ذراعك ؤ ترجاه

وإياك لغيرو تخنع

كان بو مال او مقام ما تخشاه

لا تعول عليه في شدة ولا تتسناه

زرع لخير سجد لله واركع

راه بنادم زريعتو عادت سوسة

المن والحقد وطريقو كحلة مدسوسة

ايلا ما ضرك اصاحبي ما ينفع

فشد في الله

ركل لخاوي ؤفوت تلقاه

محيه من بلانك ...

ؤ قطر عليه الشمع

فاسمع يا هذاك الغادي بلا نعالة

لمخ مثقوب عامر خم ونخالة

جوج وجوه هزيل بالطبع

لا تقلب تزين ذيك الصورة

تبان شي زوين لقناع والتنورة

ؤ بالتبلحيس تسوق وتزوق وتلمع

او تبان زعما سبول مأصل

حنين سموح ؤ عليه تعول

فْحَل في الوحلة فارس سبع

سول على دواخلك وتطهر من لقباحة

طبع لبهايم الخسة ولوساخة

زين راسك لراسك...

وفي لغريب لا تيق وتورع

ذاك ل سمان وفقد لامان

او ذاك لمكسي وهو عريان

مكشوفة فعالو ولحبل لمروة قطع

شد في الله

هو لخليل ؤ لمن تشكي ليه الاه

الواحد الحافظ من كيد عداه

الناصر المعز فتوسل وتضرع

دنيا امتحان ورحاها دوارة

تسقيك حنظل ف شرورها فوارة

ولعيان باش يطيح في خبثها...

يقبع فيها ؤ ما يطلع

بل يكرهك على الضحكة

وسخة ورمادو يدير لحكة

قهرو شرو ؤ ما يبقى يبرق ما يقشع

بل يولي عندو ك الشر ك الخير

المهم ينفت سمو ولسانو كير

يطفي كرهو ولبغضو يشبع

فخليه في غلالو مشدود

على الكلخة محطوط ممدود

ؤ بعد عن كلثة لانين ولوجع

فاسمع

شد في الله هو مولاك

لوح ل لا حك ؤ حطو وراك

ؤ باش ترتاح لعقول

راه ربي فرقها ؤ ما ليها جمع

فاسمع

شد في الله

صفي ونقي ؤ خشاه

قرا واكتب وابدع

بني بروجك بين وراق الريحان

خوذ لحروف خل وحمرة النعمان

لا تركب لبهوت ولا الوان...

ولبنادم ما تنافق ما تصنع

***الشاعر والزجال: احمد الكندودي ***المغرب ***

كل التفاعلات:

١١