شطحات
سوڨ و سواڨة و دلال
و تلمت نسوة و رجال
دنيا يحكم فيها المال
يا عمري ماشي و تذبال
لاحڨ عالعمة و الخال
يا عمري كيف تخليت
مخليني نسنا مشيت
مزروب و فيسا تعديت
كي الحلمة الشباب خذيت
خطوة خطوة هاني جيت
موش خايف عارف ل ِكبرت
كبرت و نحكي مع المنڨالة
ڨلتلها هدي يا خالة
تجري مفجوعة في حالة
تك .. تك نسيتي موالا
زاد السبسي كبس حبالا
في بدني عامل خُبَالة
هيا قومي شدي رحالا
يا عمري تمت لقوالا
يا بنتي شدي المفتاح
بصوتك هديها لرياح
ذري الحنة تجي لفراح
مدي بحرفك ألف جناح
مدي جناحاتك ترتاح
نفسك و اداوي لجراح
راجع متهني و مرتاح
مخليلك شِعْرِي مصباح
مصباحي يضوي زيديه
زيت حروفك و عليه
نورا ساطع ما تنسيه
ضي القصيدة تلڨيه
في طريڨك عامل توجيه
و حتى اسمك حافل بيه
الشاعر عالم و فقيه
مهندس غدوة و ما فيه
الغاية لخصت حياتي
الشعر و ولدي و بناتي
لميمة مرتي و خواتي
خوتي و اصحابي و كلماتي
هاذم جلّ اهتماماتي
نسمي فيهم قبل أماتي
هاني نكمل في جلساتي
و الشعر يفسر شطحاتي
الهاشمي البلعزي
في
2024/01/14
ليست هناك تعليقات:
إرسال تعليق