ماهيش صدفه ..
ولا هي أول مره تعملها
داست على جرحي ميت مره
وكأنه تار لازم أوفيه
وف كل مره كنت اضحك
وورا ضهري من ده كتير
وارميه
وارسم الضحكه ماليه الوش
وأقول ياواد .. معلهش
دي متقصدش
وبين النن والرمش
حُبها دايماً مداريه
واداديها ، واحايلها
وتتعالى ، واسامحها
واحارب لجلها النسمه
خوف عليها تجرحها
واعمل بلياتشوا ف قلب السيرك
وأتنطط وأفرحها
ولو ازعل ، يادوب ساعه
القاني بحنلها
واضحك تاني على نفسي
واقول أنا أعمل أيه ؟
حاربتني!
واصرخ بعلو صوتي المخنوق
ياخلق هووووه ، إحتلتني
وأيه يجرى لو عطفت على روحي
وحبتني
وانا ال كنت أغنيلها ..
شحات الغرام
إرموله نظره ، ولا ابتسامه
حسنه وتنفع يوم القيامه
دا كسر خاطره حرام
ولا كان له ف الحب سوابق
ولا كان وش إجرام
وبرضوا لا بتهدى ولا بتحن
والأغرب
لسٌاني بتلهف على بلة ريق
من نيلها
ليست هناك تعليقات:
إرسال تعليق