الثلاثاء، 16 يناير 2024

هي الملايير ***

 هي الملايير ***

هي الملايير
سرقها غول
غلى لعدس والفول
رد بنادم محتاج فقير
ما عاد يعرف حوالو
الحق حاف عليه و دًاه لو
ردوا لمفجوع مضرور..
وراس مالو حصير
ومول الملايير
زاد تغنى وتعلا
داس بثقلو سهول لقمح والغلة
ضاعت البذرة الاصيلة...
وضاع الخير
مول الملايير
نسى لبارح نبعو واش كان
عربط باش جمع السلطة والمال يا فلان
ما نتج فضل مَشْكل رايو ضرير
دار كلشي خصوصي
تقرا حتى تعيا وعندو تخدم آسي
حوط على الغد والحلم...
زربو بالشوك والكير
راسي ياراسي فلسافتو
غارق في لمال ؤ حتى حاجة م كفاتو
عطاه الله الصهدة ...
ؤ حرق سهول التين وشعير
مول الملايير
ما بغى يشوف روينة ولا وسخ
قال شطبو لعفن راه ما يصلح
ما فرش قبل زلتو ...
وما حسب الخطوة والتفكير
افلاطونية الفيش والرياش
في دينو كلشي عبد تراس
مضى مواسو ...
ؤ ذبح الفرحة في عيون العصافير
وهي الملايير
حوش عليها الغول
ما خلا كرموس ولا زعبول
ما عاد يقد عليه حد
واخا هدم وريب وجلد
الريال حصانة...
باك صاحبي ؤ دفوع كبير
مول الملايير
رهن لبلاد ولعباد
دار المستديرة قفص ووتاد
ربط لعقلية ؤبخرها بالنقص والتغرير
معاه كحالت العيشة
لخلق بات جثة مريشة
بح من صراخو...
وبالقهرة عاد عاجز خانع صغير
لعب بريالو ؤ عاد سي السيد
شرى بنادم بالرخا طبع عليه معود
ركب ظهر القطيع ...
جمع وطوى ؤزادها هزان ونكير
نسا ان مالو بالسحت مطلي
وانه في الحضيض ملعون وخا معلي
ظنها ليه خالدة ...
ونسى لحساب ولقبر واش كان تيدير
ذيك البركة يكزون ويخليها
ب لحرام فرخت سلعتو واش جا ما يداويها
ولد النهاب يبقى نهاب طاغي كبير
مول الملايير
جوع الناس ؤ بغى يعيش غ هو
ما يعرف وضع نكار دائما يتلوى
كلشي عندو بثمن...
لا نضج زين لا تفكير
مول الملايير
*** الشاعر والزجال: أحمد الكندودي ***المغرب ***
قد تكون صورة ‏‏‏شخص واحد‏، و‏قبعة‏‏ و‏نظارة‏‏
كل التفاعلات:
١

في

ليست هناك تعليقات:

إرسال تعليق

الاشتراك في: تعليقات الرسالة (Atom)

كيف أنّجو من غوصّي فيكِ

  كيف أنّجو من غوصّي فيكِ وصوتكِ يجعلني فيهِ غريق كيف أنقذ نفسي من جحيمكِ وهمسكِ يشعلّ في صدري الحريق كيف أجد السبيل الى خلاصي منكِ وكلما اه...